Հայ
Օգոստոսի 28-30 Ժնևում կայացավ ՄԱԿ-ի Եվրոպական տնտեսական հանձնաժողովի` Կլիմայի փոփոխության վիճակագրության հիմնախնդիրների փորձագիտական համաժողովը: Փորձագիտական այս համաժողովները կազմակերպվում են 2014 թվականից ի վեր՝ կապ ապահովելով կլիմայական տեղեկատվության տրամադրողների և օգտագործողների միջև և ծառայելով որպես յուրօրինակ հարթակ համագործակցության, գաղափարների և փորձի փոխանակման, հայեցակարգերի, մեթոդաբանությունների քննարկման և գործնական ուղեցույցների մշակման համար:
Այս տարի միջոցառման մասնակիցների ուշադրության կենտրոնում էր ազգային վիճակագրական գերատեսչությունների դերը քաղաքականություն մշակողներին կլիմայական տվյալների տրամադրման, հանրությանը կլիմայի փոփոխության զարգացումների իրազեկման, կլիմայի փոփոխության հետ կապված վիճակագրության և ցուցանիշների տարածման, հաղորդակցման ռազմավարությունների բարելավման, կառավարության շահառուներին Փարիզյան համաձայնագրով նախատեսված ջերմոցային գազերի գույքագրման, մեղմման և հարմարվողականության գործողությունների մասով հաշվետվողականության պահանջների իրականացմանն ուղղված աջակցության և այլ գործընթացներում:
Միջոցառմանը մասնակցում էին նաև ՀՀ վիճակագրական կոմիտեի ներկայացուցիչներ՝ ՀՀ վիճակագրության պետական խորհրդի անդամ Նելլի Բաղդասարյանը, Բնապահպանության վիճակագրության բաժնի ավագ մասնագետ Նաիրա Մանդալյանը և ՄԱԶԾ Կլիմայի փոփոխության ծրագրի գենդերային և սոցիալական խոցելիության հարցերով փորձագետ Աստղիկ Միրզախանյանը, ովքեր ներկայացրեցին Հայաստանում կլիմայի փոփոխությանն առնչվող վիճակագրության առկայության և հավաստիության վերաբերյալ խնդիրները, ինչպես նաև արդար անցում ապահովելու համար պահանջվող գենդերային և սոցիալական խոցելիության ցուցանիշները: Նելլի Բաղդասարյանը և Աստղիկ Միրզախանյանը ելույթներից բացի համաժողովի մասնակիցների քննարկմանը ներկայացրել էին նաև թեմատիկ հոդվածներ:
Նելլի Բաղդասարյանը՝ ՀՀ վիճակագրական կոմիտե, հոդված և շնորհանդես
Աստղիկ Միրզախանյան, Դիանա Հարությունյան՝ ՄԱԶԾ Կլիմայի փոփոխության ծրագիր, հոդված և շնորհանդես
Համաժողովի օրակարգը, խոսնակների վերաբերյալ տեղեկատվությունը, ինչպես նաև բոլոր մնացած ներկայացված նյութերը հասանելի են այստեղ:
