Հայ
Նոյեմբերի 21-ին «ԵՄ-ն կլիմայի համար» ծրագրի շրջանակներում տեղի ունեցավ Հայաստանի Հանրապետության «Կլիմայի մասին օրենքի» նախագծի վերաբերյալ ազգային աշխատաժողովը:
Աշխատաժողովի նպատակն էր քննարկել կլիմայական օրենսդրության միջազգային փորձառությունը, ԵՄ և ԱլԳ երկրներում կլիմայի մասին օրենքների մշակման պրակտիկան և «ԵՄ-ն կլիմայի համար» ծրագրի ներքո մշակված ՀՀ «Կլիմայի մասին օրենքի» նախագիծը:
ԵՄ պատվիրակության ղեկավար, դեսպան Վասիլիս Մարագոսն իր ողջույնի խոսքում նշեց.
«Կլիմայի մասին օրենքը էական նշանակություն ունի, քանի որ կլիմայական գործողությունների, համակարգման և ներդրումների ներգրավման համար անհրաժեշտ է իրավական շրջանակ: Մենք ուրախ ենք համագործակցել Կառավարության և ՄԱԿ-ի Զարգացման ծրագրի հետ «ԵՄ-ն կլիմայի համար ծրագրի» շրջանակներում և վերահաստատում ենք մեր պատրաստակամությունը՝ աջակցելու օրենքի հետագա գործընթացին»:
Ընդգծելով կլիմայական գործողությունների համար օրենսդրական կարգավորման կարևորությունը, ՄԱԿ-ի Զարգացման ծրագրի Մշտական ներկայացուցիչ Նաթիա Նացվլիշվիլին ասաց.
«Հայաստանի կլիմայի մասին օրենքը իրավական հիմքեր կապահովի արդյունավետ կլիմայական քաղաքականությունների մշակելու և իրականացնելու, այդ նպատակով ֆինանսական ռեսուրսների հավաքագրելու, կլիմայական նկատառումները ոլորտային քաղաքականություններում ներառելու և կլիմայական ֆինանսավորումը հանրային ֆինանսների կառավարման համակարգում ներկառուցելու համար»:
Շրջակա միջավայրի նախարարության անունից Կլիմայական քաղաքականության վարչության պետ Նոնա Բուդոյանը երախտագիտություն հայտնեց Հայաստանում ՄԱԶԾ գրասենյակին «Կլիմայի մասին» օրենքի նախագծի մշակմանն աջակցելու համար՝ ընդգծելով դրա կարգավորիչ դերը կլիմայական քաղաքականությունների առաջմղման գործում և հույս հայտնեց այս գործընթացում հետագա համագործակցության համար:
ԵՀ Կլիմայական գործողությունների գլխավոր տնօրինության Քաղաքականության մասնագետ Ֆաբիեն Պորչերը ներկայացրեց ԵՄ Կլիմայի օրենքի մշակման ընդհանուր կարգը՝ անդրադառնալով դրա հիմնական հատկանիշներին, կառուցվածքին և ԵՄ կլիմայական չեզոքության հիմնական նպատակներին:
«ԵՄ-ն կլիմայի համար» ծրագրի միջազգային փորձագետ Ջոն Ուորդը խոսեց կլիմայի մասին օրենքների մշակման միջազգային փորձից, մասնավորապես՝ ներկայացնելով օրինակներ տարբեր երկրների փորձառությունից և ընդգծելով կլիմայի մասին շրջանակային օրենքների առանձնահատկությունները և այդ օրենքների դրույթները, որոնք նպաստում են կլիմայի փոփոխության մեղմմանն ու հարմարվողականությանը:
Ծրագրի փորձագետ Հեղինե Գրիգորյանը ներկայացրեց զեկույց ՀՀ «Կլիմայի մասին» օրենքի հիմունքների մասին՝ խոսելով դրա շրջանակի, կառուցվածքի, ինստիտուցիոնալ կառուցվածքի, կարգավորող շրջանակի, և օրենքով սահմանված կլիմայական քաղաքականությունների պլանավորման և կառավարման համակարգի մասին:
Ծրագրի փորձագետ Մարի Կարապետյանը խոսեց «Կլիմայի մասին» օրենքով ստեղծվելիք Կլիմայի փոփոխության նոր խորհրդի մասին, որը կաջակցի կառավարությանը երկրի կլիմայական քաղաքականությունների մշակման, իրականացման և միջազգային համաձայնագրերով ստանձնած պարտավորությունների իրագործման գործում: Նա մանրամասներ ներկայացրեց խորհրդի հիմնական լիազորությունների, կառուցվածքի և գործունեության վերաբերյալ:
«ԵՄ-ն կլիմայի համար» ծրագրի Առաջադրանքի ղեկավար Արտակ Բաղդասարյանը ներկայացրեց տեղեկատվություն կլիմայական ֆինանսավորման և կլիմայական քաղաքականությունների կարգավորման գործիքների մասին՝ անդրադառնալով ֆինանսավորման մեխանիզմներին և աղբյուրներին, ջերմոցային գազերի արտանետումների թույլտվությունների համակարգին, ինչպես նաև՝ կլիմայական ծախսերը հանրային ֆինանսների կառավարման համակարգում ներկառուցմանը:
Աշխատաժողովը խթանեց մասնակիցների միջև երկխոսություն, որի ընթացքում խոսնակները արձագանքեցին բարձրացված մտահոգություններին և հարցերին:
Միջոցառմանը մասնակցում էին ավելի քան 50 ներկայացուցիչներ Եվրոպական հանձնաժողովից, Հայաստանում ԵՄ պատվիրակությունից, ՄԱԶԾ գրասենյակից, ՀՀ շրջակա միջավայրի, տարածքային կառավարման և ենթակառուցվածքների, էկոնոմիկայի, ֆինանսների և առողջապահության նախարարություններից, միջազգային կազմակերպություններից, օտարերկրյա և տեղական փորձագետներ:
