Կլիմայի փոփոխության հատուկ ֆոնդ

Հիմնվել է Մարրաքեշի պայմանավորվածությունների կողմից որպես Կոնվենցիայի նոր ֆոնդ: Ֆոնդի նպատակն է լրացուցիչ ֆինանսավորել կլիմայի փոփոխության նախագծերը, որոնք ֆինանսավորվում են ԳԷՖ-ի և երկկողմանի ու բազմակողմանի ֆոնդերի կողմից: Կողմերի 7-րդ կոնֆերանսի որոշմամբ Կլիմայի փոփոխության հատուկ ֆոնդը պետք է խթանի երկկողմանի ու բազմակողմանի աղբյուրներից տրամադրվող լրացուցիչ ռեսուրսների տրամադրումը հետևյալ 4 ոլորտներում.

• հարմարվողականություն
• տեխնոլոգիաների փոխանցում
• էներգետիկա, տրանսպորտ, արդյունաբերություն, գյուղատնտեսություն, անտառաբուծություն և թափոնների կառավարում
• տնտեսության դիվերսիֆիկացիա այն երկրների համար, որոնց եկամուտները կախված են հանածո վառելիքից:

Կողմերի 9-րդ կոնֆերանսի որոշմամբ այս ֆոնդի համար որպես գերակայող ուղղություններ հաստատվեցին հարմարվողականությունը, տեխնոլոգիաների փոխանցումը և հզորությունների ամրապնդումը և մշակվեցին ուղեցույցներ:

ԳԷՖ-ի խորհրդի կողմից հաստատվեց գործողությունների ծրագիր, որտեղ ամրագրվում են ֆոնդի ռեսուրսների օգտագործման հիմնական ոլորտները.

Հարմարվողականության բնագավառում.

• ջրային ռեսուրսներ, հողերի կառավարում, գյուղատնտեսություն, ինֆրաստրուկտուրայի զարգացում, խոցելի էկոհամակարգեր և առափնյա զոնայի կառավարում
• մոնիտորինգ, վաղ ահազանգման համակարգի զարգացում կլիմայի փոփոխության հետևանքով հիվանդությունների կանխման նպատակով
• հզորությունների ամրապնդում կլիմայի փոփոխության հետ կապված աղետներն ուղղորդեու նպատակով
• արտակարգ եղանակային երևույթների վաղ ահազանգման ազգային և տարածաշրջանային կենտրոններ և տեղեկատվական ցանցեր:

Տեխնոլոգիաների փոխանցման բնագավառում.

• տեխնոլոգիական կարիքների գնահատում
• տեխնոլոգիաների վերաբերյալ տեղեկատվություն
• հզորությունների ամրապնդում
• հնարավորինս համապատասխան շրջակա միջավայր:

Որոշումը հորդորում էր նաև չուշացնել ֆոնդի գործարկումը:

2004թ. Կողմերի 10-րդ կոնֆերանսը ողջունեց ֆոնդի առաջին 9 դոնորներին, որոնց ներդրումը կազմում էր US$36.7 միլիոն, որի US$34 միլիոնը հատկացվել է հարմարվողականությանը, իսկ US$2.7 միլիոնը` տեխնոլոգիաների փոխանցմանը: