Կլիմայի փոփոխության փորձագետների միջկառավարական խումբ (ԿՓՓՄԽ)

Ստեղծվել է 1988թ., մինչև Կոնվենցիայի ընդունումը` Համաշխարհային օդերևութաբանական կազմակերպության և ՄԱԿ-ի շրջակա միջավայրի ծրագրի կողմից: ԿՓՓՄԽ-ն Կոնվենցիայի կազմակերպություն  չի համարվում:

ԿՓՓՄԽ-ն ուսումնասիրություններ չի կատարում, սակայն մանրամասնորեն ամփոփում է համաշխարհային տեխնիկական և գիտական գրականությունը և հրատարակում գիտական հաշվետվություններ, որոնք ճանաչվել են  որպես կլիմայի փոփոխության մասին գոյություն ունեցող լավագույն և  ամենավստահելի տեղեկատվական աղբյուրներից մեկը:

Հինգ տարին մեկ հրապարակում է գնահատման զեկույցներ կլիմայի փոփոխության բնագավառում գիտական ուսումնասիրությունների վիճակի մասին: Գնահատման առաջին  զեկույցը լույս է տեսել 1990թ., որտեղ բացահայտվում են կլիմայի փոփոխության գիտական հիմունքները և օգնում են սկսելու Կոնվենցիայի բանակցությունները: Գնահատման երկրորդ զեկույցը լույս է տեսել 1995թ. և ընդունվել 1996թ. Կողմերի երկրորդ կոնֆերանսի կողմից, որտեղ հիմնավորվեցին այն բանակցությունները, որոնք հանգեցրին Կիոտոյի արձանագրության ընդունմանը: Վերջինը` Գնահատման երրորդ զեկույցը, ներկայացվել է  Կողմերի երրորդ կոնֆերանսին,  2001թ.: Զեկույցում նոր և առավել հիմնավոր  ձևով ներկայացվում է գլոբալ տաքացման երևույթը: Ներկայումս  քննարկվում է գնահատման չորրորդ զեկույցը, որը պետք է ընդունվի 2007թ. սեպտեմբերին:

Հրատարակում է նաև Տեխնիկական հաղորդագրություններ (Technical Papers)  և Հատուկ զեկույցներ (Special Reports), նրանց մի մասը՝ հատուկ թեմաներով՝ Կողմերի կոնֆերանսի  կամ Գիտական և տեխնիկական խորհրդատվության օժանդակ մարմնի հարցման համաձայն: Վերջիններս լույս են տեսնում անգլերեն և ռուսերեն:

Իրականացնում է նաև կարևոր աշխատանք մեթոդոլոգիայի բնագավառում՝ Կողմերի կողմից ջերմոցային գազերի ազգային կադաստրների մշակման ընդհանուր ուղեցույցների պատրաստման գործընթացում: "ԿՓՓՄԽ 1996. Ջերմոցային գազերի ազգային կադաստրների վերանայված ուղեցույցները"  բոլոր Կողմերն օգտագործել են արտանետումների տարեկան կադաստրների պատրաստման համար:  ԿՓՓՄԽ-ն   մշակել է նաև ուղեցույցներ, որոնք օգնում են Կողմերին տվյալների  անորոշությունների հետ կապված հարցերում,  ինչպես նաև օժանդակում են օգտագործելու  լավագույն փորձը արտանետումների կադաստրների կառավարման գործում: 

ԿՓՓՄԽ-ն   կազմված է աշխատանքային երեք խմբից.

• I աշխատանքային խումբն ուսումնասիրում է կլիմայի փոփոխության գիտական հարցերը,
• II աշխատանքային խումբն ուսումնասիրում է կլիմայի փոփոխության ազդեցության, խոցելիության և հարմավողականության հարցերը,
• III աշխատանքային խումբն ուսումնասիրում է կլիմայի  մեղմման հարցերը:

ԿՓՓՄԽ-ն ներառում է նաև Ջերմոցային գազերի ազգային կադաստրների նպատակային  խումբը, որը ստեղծվել է 1996թ.