Գլոբալ էկոլոգիական ֆոնդ (ԳԷՖ)
Բազմամիլիարդանոց ֆոնդ է, ստեղծվել է 1991թ. (մինչև 1994թ.՝ փորձնական փուլով) Համաշխարհային բանկի, ՄԱԿ-ի զարգացման ծրագրի (UNDP) և ՄԱԿ-ի շրջակա միջավայրի ծրագրի (UNEP) կողմից, որպեսզի ֆինանսավորի զարգացող երկրների գլոբալ բնապահպանական նշանակության նախագծեր ոչ միայն կլիմայի փոփոխության, այլ նաև կենսաբազմազանության և միջազգային ջրերի պահպանության և միայն Արևելյան Եվրոպայի ու Կենտրոնական Ասիայի երկրների համար՝ օզոնային շերտի պահպանության բնագավառում:
Նրա պարտավորությունների շրջանակները լայնացել են` ներգրավելով նաև հողերի դեգրադացիան և կայուն օրգանական աղտոտիչները: ԳԷՖ-ը ֆինանսավորում է նաև "Օրակարգ 21"-ի ներքո այլ գործողությունների համաձայնեցված հավելյալ ծախսերը, եթե դրանք վերը նշված բնագավառներում հանգեցնում են համամոլորակային բնապահպանական շահույթի:
Որպես "բոլոր Կողմերի իրավահավասար և հավասարակշռված ներկայացուցչություն ունեցող կառավարման թափանցիկ համակարգով" միջազգային կազմակերպություն` ԳԷՖ-ը կատարում է Կոնվենցիայի ֆինանսական մեխանիզմի դեր:
Նա անհատույց կամ արտոնյալ հիմունքներով զարգացող երկրներին է փոխանցում միջոցներ և տեխնոլոգիաներ: 1996թ. Կողմերի 2-րդ կոնֆերանսն ԳԷՖ-ի հետ ընդունեց փոխըմբռնման հուշագիր` ապագայում նրա դերի և պարտականությունների մասին: 1998թ. Կողմերի 4-րդ կոնֆերանսն այս դերը շարունակական հիմունքներով հանձնեց ԳԷՖ-ին, պայմանով, որ յուրաքանչյուր 4 տարին մեկ ներկայացվի հաշվետվություն:
ԳԷՖ-ը հաշվետու է Կողմերի կոնֆերանսին, որը որոշում է կլիմայի փոփոխության բնագավառում նրա քաղաքականությունը, ծրագրային գերակայությունները և ֆինանսավորման չափանիշները: Կողմերի կոնֆերանսը կանոնավոր ձևով կլիմայի փոփոխության աշխատանքներում ԳԷՖ-ին ապահովում է ուղեցույցով, որը հիմնվում է Իրականացման օժանդակ մարմնի տված երաշխավորության վրա:
ԳԷՖ-ի ղեկավարությանն են հանձնվել ևս 3 ֆոնդեր` Կլիմայի փոփոխության հատուկ ֆոնդը, Նվազագույն չափով զարգացած երկրների ֆոնդը և Ադապտացիոն ֆոնդը, որոնք ստեղծվեցին Մարրաքեշի պայմանավորվածությունների համաձայն և հայտնի են որպես Մարրաքեշի ֆոնդեր:
ԳԷՖ-ը ֆինանսավորում է գլոբալ շրջակա միջավայրի պահպանությանը նպատակաուղղված նախագծերի "համաձայնեցված լրիվ հավելյալ ծախսերը": Այսինքն, ԳԷՖ-ը ծածկում է նախագծի լրիվ արժեքի միայն մի մասը: ԳԷՖ-ը ֆինանսավորում է նաև այն խթանող գործունեությունը, ներառյալ նաև "բոլոր համաձայնեցված ծախսերը", որոնք կապված են ազգային զեկույցների նախապատրաստման հետ:
