Ջեռուցման և տաք ջրամատակարարման վերականգնում Երևան քաղաքի Ավան թաղամասում

Նախագծի շրջանակներում նախատեսվում է վերականգնել կենտրոնացված ջերմամատակարարումը Երևան քաղաքի Ավան թաղամասի բնակելի շենքերում:

Իննսունական թվակկաների տնտեսական և էներգետիկ ճգնաժամի հետևանքով քաղաքային ջեռուցման և տաք ջրամատակարարման վրա հիմնված նախկին` զգալիորեն կենտրոնացված ջեռուցումը Հայաստանի բոլոր քաղաքներում գործնականում փլուզվեց, և բնակիչները ջեռուցման իրենց կարիքները հոգալու համար ստիպված էին օգտագործել էլեկտրականություն, փայտանյութ, գազ, նավթ կամ այլ պատահած միջոցներ: Նախագծով նախատեսվում է վերականգնել կենտրոնացված թաղային ջեռուցման համակարգը մայրաքաղաք Երևանի ծայրամասում գտնվող Ավան բնակելի թաղամասում: Ի տարբերություն Հայաստանում նախկինում իրականացված փորձնական ծրագրերի, կվերականգնվի ոչ միայն բնակարանային ջեռուցումը, այլ նաև տաք ջրի մատակարարումը: Բացի այդ, կտեղադրվի 13.48 ՄՎտ կոգեներացիոն սարք` էլեկտրաէներգիա արտադրելու և բաշխիչ ցանցին փոխանցելու համար:

 ՀՀ բնապահպանության նախարարությանը կից աշխատանքային խումբը մշակել է նշված վերականգնման տեխնիկատնտեսական հիմնավորումը: ԱՄԶԾ/ԳԷՖ "Հայաստան. քաղաքային ջեռուցման և տաք ջրամատակարարման էներգաարդյունավետության բարձրացում"  ծրագրի շրջանակներում հետագա աջակցություն է ցուցաբերվել այդ փաստաթղթի քննարկմանն ու բարելավմանը, իսկ ստացված արդյունքներն ու վերջնական առաջարկները ներկայացվել են 2006 թվականին դանիական "Ռամբոլլ" խորհրդատվական ընկերության կողմից պատրաստված "Երևան քաղաքի Դավթաշեն և Ավան համայնքներում ջեռուցման և տաք ջրամատակարարման վերականգնման նախնական հիմնավորման" փաստաթղթում:  

Նախագծի իրականացման նպատակով "Եվրոսիբէներգո-էնջինիրինգ" ՍՊԸ-ի (Ռուսաս-տան), պոտենցիալ ներդրողի և ՀՀ կառավարության միջև ստորագրվել է փոխըմբռնման հուշագիր: 2006թ. օգոստոսին հիմնադրվել է "Հայռուսկոգեներացիա" ՍՊԸ-ն, որի բաժնետոմսերի մեծ մասը պատկանում է "Եվրոսիբէներգո-էնջինիրինգ" ընկերությանը, իսկ որոշակի, փոքր մասը` Ավան համայնքին:

Նախագծով նախատեսվում են հետևյալ աշխատանքները.

• (i) 12.3 ՄՎտ հզորությամբ էլեկտրական և ջերմային էներգիայի համակցված արտադրության նոր տեղակայանքի հիմնադրում` ջերմամատակարարման հիմնական պահանջարկը բավարարելու համար. (ii) միայն ջերմային արդյունավետ կաթսաների տեղադրում` ջեռուցման ժամանակաշրջանի առավելագույն պահանջարկը բավարարելու համար (60 ՄՎտ).
• խմբային ջերմային ենթակայանների ամբողջական վերակառուցում (ջերմափոխանակիչներ, էներգաարդյունավետ շրջանառության պոմպեր, ճնշումային վերահսկման համակարգեր և այլն).
• հին առաջնային և երկրորդական ցանցային պոմպերի 100%-նոց փոխարինում.
  շենքերում ներքին ջերմային ցանցերի վերականգնում, ներբնակարանային չափիչ և այլ սարքավորումների տեղադրում:

Նախագծի իրականացման դեպքում ակնկալվում են հետևյալ արդյունքները.

• CO2-ի և այլ աղտոտիչ արտանետումների նվազեցում.
• ներմուծվող հանածո վառելիքի արդյունավետ օգտագործում.
• ներբնակարանային օդի որակի, հարմարավետության և անվտանգության աստիճանի բարելավում այն բնակարաններում, որոնք ներկայումս ջեռուցվում են անհատական ջեռուցման սարքավորումներով.
• բնակարանատերերի և հանրային սպառողների համար մատչելի և հուսալի ջերմամատակարարման ապահովում.
• նոր տեխնոլոգիաների փոխանցում.
• երկրի համար օտարերկրյա ուղղակի ներդրումների ներգրավում.
• ներբնակարանային էներգախնայողություն.
• էներգետիկ ծառայություններ մատուցողների համար զբաղվածության նոր հնարավորությունների ստեղծում:

Նախագծային գաղափարի նկարագրությունը ներկայացվել է ՄԱԶԾ-ի Հազարամյակի զարգացման նպատակների ածխածնային հիմնադրամի գլխամասային գրասենյակ` առաջարկվող նախագծային գործունեության գնահատման և հետագա հաստատման համար: