Անտառային և խոտածածկ տարածքների հրդեհների թեմայով սեմինարներ` Սյունիքի մարզի աշակերտների և ուսուցիչների համար (20-21/5/2011)

Ելնելով Շիկահողի պետական արգելոցի տարածքում պարբերական կրկնվող խոտածածկ տարածքների հրկիզման դիտարկումներից` անտառային և խոտածածկ տարածքների հրդեհների մասին հանրային իրազեկման միջոցառումներ են կազմակերպվել տվյալ տարածքի դպրոցներում: Անտառային և խոտածածկ տարածքների հրդեհների թեմայով դասերը “Կլիմայի փոփոխության հետևանքների նկատմամբ Հայաստանի լեռնանտառային էկոհամակարգերի հարմարվողականության բարձրացում” ՄԱԶԾ/ԳԷՖ/00051202 ծրագրի շրջանակենրում կլիմայի փոփոխության և անտառների հարմարվողականության մասին  Սյունիքի մարզում 2010թ. մայիսին և 2011թթ. ապրիլին  անցկացված սեմինարների շարունակությունն էին:

Կլիմայի փոփոխությամբ պայմանավորված ռիսկերի տեսանկյունից Սյունիքի եզակի անտառային էկոհամակարգերը ճանաչվել են որպես ծայրաստիճան խոցելի: Հրդեհների աճող վտանգը պայմանավորված է նաև կլիմայի փոփոխությամբ : Միևնույն ժամանակ Սյունիքի մարզում նկատվում է անտառային հրդեհների դեպքերի թվի աճ ` ընդգրկելով  անտառային մեծ տարածքներ: Անտառային հրդեհների հիմնական պատճառներից մեկը գյուղատնտեսական թափոնների այրման  և արոտավայրերի հրկիզման գերակայող ավանդույթն է :  Կլիմայի փոփոխության պայմաններում առկա  է հրկիզված դաշտերից դեպի անտառներ կրակի տարածման ռիսկը և այնուհանդերձ ամայի այրված տարածքների առաջացումը:

Գեղանուշ, Շիկահող և Ծավ համայնքներում անցկացրած սեմինարների նպատակն էր տեղեկացնել աշակերտներին, ինչպես նաև նրանց ուսուցիչներին անտառային և խոտածածկ տարածքների հրդեհների պատճառների, ռիսկերի և հետևանքների մասին: Դասընթացի ժամանակ քննարկվեցին այնպիսի թեմաներ, ինչպիսիք էին Սյունիքի մարզի անտառների կենսաբազմազանությունը, կլիմայի փոփոխության ներքո անտառների խոցելիությունը, ինչպես նաև անտառային հրդեհների կանխումը:  Դասերի ինտերակտիվ բաղադրիչի շրջանակում աշակերտներն արտահայտեցին իրենց կարծիքը մարզում առկա վտանգված տեսակների, ինչպես նաև անտառային հրդեհների պատճառների մասին:

Երեք սեմինարներին  ընդհանուր առմամբ մասնակցեց 102 աշակերտ և 24 ուսւոցիչ Գեղանուշ, Շիկահող և Ծավ համայնքներից, ինչպես նաև դրանց հարևանությամբ գտնվող Ճակատեն, Սրաշեն և Ներքին Հանդ համայնքներից: 

Սեմինարին մասնակցած աշակերտներին առաջարկվեց հետագայում քննարկել այդ թեմաները և հանձնարարվեց գրել շարադրություն անտառային հրդեհների և այլ հարակից բնապահպանական թեմաների շուրջ: