Հանրային իրազեկման բարձրացմանն ուղղված սեմինարներ Սյունիքում՝ "Անտառային կենսաբազմազանություն և կլիմայի փոփոխություն" թեմայով (13-15/05/10)

2010թ. մայիսի 13-ից 15-ը Գորիս և Կապան քաղաքների միջնակարգ դպրոցների ուսուցիչների և աշակերտների համար իրականացվեցին սենիմարներ՝ "Անտառային կենսաբազմազանություն և կլիմայի փոփոխություն" թեմայով։ Սեմինարները կազմակերպվեցին "Կլիմայի փոփոխության հետևանքների նկատմամբ Հայաստանի լեռնանտառային էկոհամակարգերի հարմարվողականության բարձրացում" ՄԱԶԾ/ԳԷՖ ծրագրի շրջանակներում:

Սեմինարներին մասնակցեցին Գորիսի, Կապանի և շրջակա համայնքների 26 միջնակարգ դպրոցների 41 ուսուցիչներ: Քննարկվեցին կլիմայի փոփոխության հետևանքների նկատմամբ Սյունիքի անտառային կենսաբազմազանության խոցելիության և հարմարվողականության բարձրացման համապատասխան միջոցառումների, ինչպես նաև մարզում բնության հատուկ պահպանվող տարածքների ցանցի ընդլայնման թեմաները։

Սեմինարները անցան ուսուցիչների ակտիվ մասնակցությամբ: Նրանք քննարկեցին թեմաների շուրջ տրամադրված նոր տեղեկությունները, և աշակերտների տարբեր տարիքային խմբերի համար կազմեցին հարմարվողականության բարձրացման գործողությունների համառոտ փորձնական պլան։

Աշակերտների համար նույն թեմայի շուրջ կազմակերպված սեմինարներին մասնակցեցին Գորիսի և Կապանի երկու դպրոցներից 57 աշակերտներ։ Երեխաները ներկայացրեցին իրենց գիտելիքները անտառի մասին, քննարկեցին անտառային կենսաբազմազանության և կլիմայի փոփոխության մասին ստացված նյութերը: Բացի դա, նրանք մշակեցին այն թեմաների և հարցերի ցանկը, որոնց վերաբերյալ կցանկանային ստանալ նոր գիտելիքներ։ Աշակերներին հանձնարարվեց գրել ռեֆերատներ հետաքրքրող հարցերի շուրջ։ Lավագույն աշխատանքները հետագայում կընտրվեն և կպարգևատրվեն:

Սեմինարների երկու խումբ մասնակիցներն էլ կարևորեցին նման դասընթացների իրականացումը և շարունակականությունը։ Սեմինարների արդյունքների, ինչպես նաև աշակերտների և ուսուցիչների կողմից ստացված առաջարկությունների հիման վրա կմշակվի հետագա դասընթացների ծրագիրը։ Դրանք հիմք են կծառայեն նաև Սյունիքի համայնքների անդամների` տեղական անտառների կենսաբազմազանության և հարակից խնդիրների վերաբերյալ իրազեկման բարձրացման հետագա իրադարձությունների համար, օրինակ` համապատասխան պրակտիկա և անտառների ավելի մանրամասն ուսումնասիրություն: