ԼԱՄ-ի ինստիտուցիոնալ կառուցվածքը

ՀՀ բնապահպանության նախարարությունը ավարտեց ՄԶՄ նախագծերի գնահատման և հաստատման պաշտոնական ընթացակարգի նախագծի մշակումը 2009թ.: Փաստաթղթի ներկա երրորդ խմբագրությունը քննարկվել և համաձայնեցվել է ՀՀ բնապահանության նախարարության իրավաբանական և նորմատիվ վարչությունների, ինչպես նաև ՀՀ արդարադատության նախարարության հետ: Ակնկալվում է, որ ընթացակարգի վերջնական հաստատումը տեղի կունենա 2010թ.:

Մշակված փաստաթուղթը նպատակ ունի (i) օգտագործել ԼԱՄ-ի գործող ինստիտուցիոնալ կառուցվածքը, (ii) լինել ոչ բյուրոկրատիկ և հնարավորինս թափանցիկ, (iii) հիմնվել փաստաթղթերի համաձայնեցման ներկայումս գործող ընթացակարգերի վրա, (iv) օգտագործել Հայստանում առաջին ՄԶՄ նախագծերի հաստատման ընթացում ձեռք բերված փորձը:

ՄԶՄ նախագծային գաղափաին հավանություն տալու կամ նախագիծը հաստատելու մասին վերջնական որոշումը կայացվում է ԼԱՄ-ի կողմից` հիմք ընդունելով հիմնական շահագրգիռ կողմերից ստացված դրական կարծիքները և եզրակացությունները: Այդ նպատակով ԼԱՄ-ը (օգտագործելով նախարարությունների և գերատեսչությունների միջև խորհրդակցման և փաստաթղթերի համաձայնեցման գործող ընթացակարգը) ստանում է ՀՀ Էկոնոմիկայի ու ՀՀ աշխատանքի և սոցիալական հարցերի նախարարությունների պաշտոնական կարծիքները նախագծերի վերաբերյալ: Այս հիմնական նախարարությունների ընտրությունը հիմնավորվում է նրանով, որ այս մարմինները պատասխանատու են տնտեսական և սոցիալական զարգացման բնագավառում երկրի զարգացման ռազմավարության մշակման և իրականացման համար, այսինքն պատասխանատու են երկրի կայուն զարգացման տնտեսական և սոցիալական բաղադրիչների համար: Ինչ վերաբերում է կայուն զարգացման բնապահպանական բաղադրիչին, ապա դրա գնահատումը իրականացնում է ԼԱՄ-ը` որպես երկրում բնապահպանական քաղաքականությունն իրականացնող նախարարություն:

ՄԶՄ նախագծերի վերաբերյալ որոշումների կայացման թափանցիկությունը և արդյունավետությունն ապահովելու նպատակով ԼԱՄ-ը սահմանել է նախագծերի գնահատման բազային չափանիշների մի խումբ, որոնք արտացոլում են երկրի կայուն զարգացման նպատակները: Այս չափանիշները կհանդիսանան ՄԶՄ նախագծերի հաստատման պաշտոնական ընթացակարգի բաղադրիչ մասը: Բացի դրանից, համապատասխան նախարարությունների և գործակալությունների կողմից պետք է հաստատվի ներկայացվող նախագծերի համապատասխանությունը տվյալ բնագավառներում պետության կողմից իրականացվող քաղաքականությանը: ԼԱՄ-ը նախագծի տեղական մասնակիցներից կպահանջի պաշտոնական գրություն, որը կհաստատի տվյալ նախագծում իրենց մասնակցության կամավորությունը: Ի հավելումն, նախագծի մասնակիցները պետք է ԼԱՄ-ին ներկայացնեն նախագծի քննարկմանը նվիրված հասարակական լսումների արձանագրությունը և/կամ խորհրդակցության ընթացքում շահագրգիռ կողմերից ստացված մեկնաբանությունները: